შემოდგომაზე მოუთმენლად ველით ხოლმე ინტერიერის დიზაინში ახალ ტენდენციებს, რა თქმა უნდა, სტილი უკვე არჩეული გვაქვს, თუმცა განახლება აქტუალობას არ კარგავს. გთავაზობთ რამდენიმე რჩევას, რომელიც დაგეხმარებათ იმაში, რომ 2024 წელს თქვენი სახლი უფრო მდიდრული და ლამაზი გახადოთ და რაც მთავარია, ეს მინიმალური ფინანსური დანახარჯებით გააკეთოთ.

ყვავილების ქოთნები

ყველამ კარგად ვიცით, რომ ლამაზი, ცოცხალი მცენარეები ოთახს უფრო ლამაზს და მდიდრულს ხდის. ერთია მცენარის შერჩევა და მეორე, თუ რაში შეიძლება მოთავსდეს ეს მცენარე? დიზაინერებმა კი უკვე იციან პასუხი - 2024 წელს პოპულარული იქნება ბუნებრივი მასალისგან დამზადებული ყვავილების ქოთნები ან მათი იმიტაციები.
განსაკუთრებით საინტერესოა ქვის ქოთნები. ბუნებრივი ტექსტურა ბევრად მდიდრულად გამოიყურება და აუცილებლად იპყრობს ყურადღებას.

დიდი ზომის ხალიჩები

მდიდრული ხალიჩა ერთ-ერთი მარტივი გზაა ინტერიერის გამდიდრებისთვის. ეს ნივთი სივრცეს სითბოს და ფერს მატებს, რაც განსაკუთრებით მნიშვნელოვანია, თუ თავად ოთახი ნეიტრალური ფერისაა. ხალიჩას შეუძლია დიზაინის განსხვავებული ელემენტები ერთ სქემად შეკრას.
ხალიჩა ლამაზი პრინტით თავისთავად ხელოვნების ნიმუშია. ახალი ხალიჩის არჩევისას აქცენტი საინტერესო პრინტებზე და ორიგინალურ ტექსტურაზე გააკეთეთ.

თაფლისფერი ტონები

2024 წლის კიდევ ერთი ტენდენციაა მდიდარი, ოქროსფერი და თაფლისფერი ფერები, რომლებიც ოთახს ძალიან მდიდრულ იერს ანიჭებენ. იმისათვის, რომ ეს ფერი ეფექტურად აქციოთ, გამოიყენეთ სხვადასხვა ტექსტურა: ქსოვილები, ხე, ქვა. ასევე არ დაგავიწყდეთ რამდენიმე აქცენტის დამატება.
თაფლისფერი მშვიდი ფერია და ფუფუნების განსახიერებაა. თბილი ტონები ძალიან კარგად გამოიყენება ნეიტრალური ტონების გასათბობად.

სასადილო მაგიდა

უჩვეულო ფორმის სასადილო მაგიდა არის ის, რაც ზედმეტი ძალისხმევის გარეშე აქცევს თქვენს ინტერიერს მდიდრულს. ეს ელემენტი გააზრებულად შექმნილი სივრცის განცდას ქმნის. საინტერესოა, რომ ბუნებრივი ფორმა ქმნის ინტიმურ ატმოსფეროს და ხელს უწყობს ადამიანების კომუნიკაციას. მაგიდის ხარჯზე შესაძლოა ოთახი სრულიად განსხვავებულად გამოიყურებოდეს.

პრიალა ზედაპირები

2024 წელს ბრუნდება გლოსი, არა მხოლოდ როგორც აქცენტი, არამედ როგორც ოთახის მთავარი თემა. მბზინავი, პრიალა საღებავი კედლებზე ძალიან მომხიბვლელად გამოიყურება და ოთახს თანამედროვე და სუფთა ელფერს ანიჭებს. თუ არ ხართ მზად ასეთი მკვეთრი ცვლილებებისთვის, შეგიძლიათ შემოიფარგლოთ რამდენიმე პრიალა აქსესუარით, მაგალითად ჩარჩოებით, ლარნაკებით და დეკორაციის სხვადასხვა ელემენტით.