ბოლო დროს ძალიან აქტუალურია სამზარეულოს ნიჟარის ფანჯარასთან დამონტაჟება. ამისთვის სამზარეულოში კომუნიკაციების გადაწყობაა საჭირო, რადგან ჩვენს ბინებში არასდროს ყოფილა გათვლილი ნიჟარა ფანჯარასთან. მოდით ვნახოთ, რამდენად გამართლებულია ამის გაკეთება და რამდენად მოსახერხებელია ფანჯარასთან ჭურჭლის რეცხვა.

სამზარეულოს ნიჟარის ფანჯარასთან განთავსება საკმაოდ ფუნქციური გადაწყვეტილებაა, რომელსაც უფრო ხშირად აგარაკებზე მიმართავენ ხოლმე. ქალაქის სახლებში მსგავსი გადაწყვეტილება ხშირად არ ამართლებს.
საქმე ის გახლავთ, რომ სტანდარტული წყობა ქალაქის ბინებში გათბობის რადიატორის ფანჯრის ქვეშ განთავსებას ითვალისწინებს. სამზარეულოს ნიჟარის ფანჯარასთან გადატანის შემთხვევაში რადიატორის კარადაში დამონტაჟება მოგიწევთ, რაც გამოიწვევს სითბოს დაკარგვას, გარდა ამისა, კარადაში სხვა ნივთების შენახვას ვეღარ მოახერხებთ. რადიატორს რომ რაიმე პრობლემა შეექმნას, მთელი სამზარეულოს გარნიტურის დაშლა მოგიწევთ, ამასთან, თავად გარნიტურიც სწრაფად დაზიანდება ტემპერატურის ცვალებადობის და მომატებული ტენიანობის გამო, რასაც სამზარეულოში საჭმლის მომზადების პროცესი იწვევს. ამ დროს ყველზე კარგი გადაწყვეტილება იქნება, გათბობის ალტერნატიული ვარიანტი შეარჩიოთ.

თუ ოჯახი დიდია და დიასახლისს ხშირად უწევს საჭმლის კეთება, გასათვალისწინებელია ის ფაქტორი, რომ ფანჯარასთან ნიჟარის განთავსების შემთხვევაში იზღუდება სამუშაო სივრცე, რამაც შესაძლოა დიასახლისს პრობლემები შეუქმნას ყოველდღიურ ცხოვრებაში. გარდა ამისა, ნიჟარის გადატანის დროს აუცილებელია კომუნიკაციების გადანაცვლება, რაც საკმაოდ დიდ პრობლემას წარმოადენს და დროთა განმავლობაში ამ გადაწყვეტილებამ შესაძლოა დიდი პრობლემები შეგიქმნათ.
ფანჯარასთან მუდმივად დგომამ შესაძლოა დიასახლისს ჯანმრთელობის პრობლემები შეუქმნას. ამ დროს გაციების რისკი ერთიორად მაღალია.

ნიჟარის ხშირად გამოყენების გამო ბუნებრივია, რომ ფანჯრის მინებიც ხშირად დაისვრება და მუდმივ წმენდას მოითხოვს.
მსგავსი გადაწყვეტილების მიღების შემთხვევაში აუცილებლად უნდა მოიფიქროთ წინასწარ, სად გადაიტანთ ჭურჭლის ტრადიციულ საშრობს, რომელიც, როგორც წესი, ნიჟარის თავზე კეთდება ხოლმე.
რაც შეეხება ამ გადაწყვეტილების დადებით მხარეებს, ფანჯარასთან ჩამონტაჟებული ნიჟარა ამარტივებს ჭურჭლის სარეცხი მანქანის მართვას.
დიასახლისის მთელი დღის განმავლობაში უზრუნველყოფილი იქნება დღის, ბუნებრივი განათებით, რაც ძალიან მოხერხებულია და კომფორტულია. გარდა ამისა, ფანჯრის ქვეშ სივრცის ათვისებით შეგიძლია გაათავისუფლოთ ადგილი სხვა ნივთებისთვის, რაც თქვენს სამზარეულოს შედარებით ფუნქციურს და მოსახერხებელს გახდის.