როგორც კალაძემ ჟურნალისტებს განუცხადა, მოხატვა მიწისქვეშა გადასასვლელებს გაალამაზებს.
„მინდა მივმართო ახალგაზრდებს. მინდა გამოვიყენოთ მათი ნიჭი. ბევრი ნიჭიერი ადამიანი გვყავს და ალბათ, შევიმუშავებთ კონკრეტულ გეგმას, რომელიც მიწისქვეშა გადასასვლელების მოხატვას ეხება. ერთადერთი, რაც ალამაზებს მიწისქვეშა გადასასვლელებში დღეს არსებულ სიტუაციას, ეს არის სწორედ ახალგაზრდების მიერ მოხატვა. შესაბამისად, მომდევნო დღეების განმავლობაში, როდესაც სრული სურათი გვექნება მიწისქვეშა გადასასვლელებზე, ახალგაზრდებს შევთავაზებთ კონკრეტულ ადგილებს, სადაც უნდა განხორციელდეს მოხატვითი სამუშაოები. ყველამ უნდა მივიღოთ მონაწილეობა ჩვენი ქალაქის დასუფთავებაში, მოვლაში, მოწესრიგებაში“, - განაცხადა კალაძემ.

დღესვე თბილისის არჩეულმა მერმა „თბილსერვის ჯგუფის“ ხელმძღვანელობას დაავალა, მიწისქვეშა გადასასვლელების დასუფთავება და მათი განათებით აღჭურვა დღესვე დაიწყოს.

კალაძემ დღეს ცირკსა და ზოოპარკის ტერიტორიაზე არსებული მიწისქვეშა გადასასვლელები დაათვალიერა და აღნიშნა, რომ სიტუაცია კრიტიკას ვერ უძლებს.
"დღეს დავათვალიერეთ მიწისქვეშა გადასასვლელები და მართლაც კრიტიკას ვერ უძლებს - ძალიან მძიმე მდგომარეობაა. აქ არის რამდენიმე მიმართულება. პირველი, რაც მინდა ვთქვა და ვთხოვო "თბილსერვისის" ხელმძღვანელს, დღესვე დავიწყოთ სამუშაოების შესრულება, მორეცხვა, ელექტროგაყვანილობა, განათება, იმიტომ რომ არაფერი არ არსებობს. სხვათაშორის იყო განათება და კამერები, მაგრამ მოგლეჯილი, დაზიანებული და გაუბედურებულია, ყველაფერი დანგრეულია. ეს ყველაფერი, რაც შეიძლება მალე უნდა მოვიყვანოთ მწყობრში და ადამიანებს უნდა ჰქონდეთ შესაძლებლობა, როცა მიწისქვეშა გადასასვლელებით ისარგებლებენ, ელემენტარული სისუფთავე იყოს და ნორმალურად შეეძლოთ გადაადგილება", - განაცხადა კალაძემ.

გარდა ამისა, თბილისის არჩეულმა მერმა "თბილსერვის ჯგუფის" ხელმძღვანელობას 10 დღის ვადაში, მიწისქვეშა გადასასვლელებთან დაკავშირებით ერთიანი სტანდარტის შემუშავებაც დაავალა.

"ჩვენ ვიცით, რომ მიწისქვეშა გადასასვლელები ქალაქში ზოგი არის გასხვისებული, ზოგი იჯარით გაცემული. ჩვენ არავის საკუთრებას არ ვეხებით. მინდა უბრალოდ გთხოვოთ, რომ ერთიანი სტანდარტი იყოს შემუშავებული. სრული სურათი წარმოადგინოთ 10 დღის განმავლობაში და ყველა ადამიანმა, მესაკუთრემ თუ ვისაც იჯარით აქვს აღებული, კეთილი უნდა ინებოს და ერთიან სტანდარტში უნდა მოიყვანოს არსებული სიტუაცია მიწისქვეშა გადასასვლელების, იმიტომ რომ უამრავი ადამიანი სარგებლობს. ბევრ კონკრეტულ ადგილზე არის მძიმე მდგომარეობა და ეს უნდა მოვაგვაროთ ძალიან სწრაფად", - აღნიშნა კალაძემ.
ინტერპრესნიუსი