ზონებად დაყოფა ნებისმიერი ფართისთვის აქტუალური თემაა, არ აქვს მნიშვნელობა, დიდია სივრცე თუ პატარა. Mროგორ უნდა დავყოთ სივრცე ზონებად?

მეთოდი ბევრნაირი არსებობს, თუმცა, თუ რემონტის გაკეთებას არ აპირებთ და ზედმეტი აურზაური არ გაწყობთ, შევეცდებით ამ პრობლემის გადაწყვეტის შედარებით მარტივი გზები შემოგთავაზოთ.

ფარდები

იმისათვის, რომ ოთახი მეტი ავეჯითა და ტიხრებით არ გადატვირთოთ გამოიყენეთ ნაჭერი. ფარდები შეგიძლიათ გამოიყენოთ არა მარტო ფანჯრებისთვის, არამედ ოთახის ზონებად დასაყოფად. ეს საკმაოდ პრაქტიკული და რაც მთავარია, მარტივი ვარიანტი გახლავთ.

ფარდებით ერთმანეთისგან შეგიძლიათ გამოყოთ სამზარეულო და სასადილო, ასევე ძალიან აქტუალურია ფარდები საძინებლისთვის, სადაც შეგიძლიათ მოიწყოთ სამუშაო კუთხე.

შეგიძლიათ შეარჩიოთ ფარდები ძაფის ეფექტით, თუმცა ასეთი ფარდები მთელ სიგანეზე არ იკიდება. ასეთი ფარდით მომცრო ზონის დაფარვაც საკმარისია.











სტელაჟი

მსუბუქი, მოხერხებული სტელაჟით ოთახის გაყოფა საკმაოდ აპრობირებული და ამასთანავე მარტივი გადაწყვეტილებაა. სტელაჟი შეიძლება იყოს ხის, შუშის, მეტალის. გარდა ოთახის გასაყოფი ფუნქციისა, სატელაჟი ნივთების შესანახადაც შეიძლება გამოიყენოთ.

სტელაჟი ძალიან მოსახერხებელია კაბინეტისა და ბავშვის ოთახის ზონირებისთვის.




გასაწევი კარები

გასაწევი კარები ინტერიერს შესანიშნავ, ექსტრავაგანტურ იერსახეს ანიჭებს.

როდესაც ეს კარები ღიაა, იქმნება დიდი სივრცის შთაბეჭდილება, რაც ოთახს დამატებით სიმყუდროვეს სძენს. გარდა ამისა, გასაწევი კარები ძალიან პრაქტიკულია მოხმარების დროს.




ტიხარი

მყუდრო გარემოს შესაქმნელად ასევე გამოგადგებათ მსუბუქი ტიპის ტიხრები.

ეს დეკორატიული ტიხარი გარკვეული ზონის ეფექტს ქმნის.

ეს მინის ტიხარი, როგორც ხედავთ, ძალიან ლამაზიც არის და სამუშაო და საძინებელ ზონებს ყოფს ერთმანეთისგან. ის ძალიან ეფექტურია, რადგან ირეკლავს შუქს და სივრცეს ადიდებს.


კოლონები და თაღები

კოლონები, თაღები და სხვა არქიტექტურული ელემენტები ხაზს უსვამენ ამა თუ იმ ზონის ვიზუალურ ეფექტს. ამ ვარიანტის უპირატესობა გახლავთ ის, რომ არ შთანთქავს სივრცეს და ოთახს ვიზუალურად უფრო მაღალს ხდის.