ეს იშვიათი დიზაინის ბინა, რომელიც საკმაოდ ძვირი ღირს - 6 მლნ დოლარი, უგემოვნებით და კონტრასტებით უფრო გახდა პოპულარული. ბინა მოსკოვშია და გასაყიდად გამოიტანეს. ბინა რუსეთის დედაქალაქის ცენტრალურ უბანშია, პრესტიჟულ კორპუსში, სადაც ვარსკვლავებსაც აქვთ ბინები. თუმცა ამ კორპუსში ეს ყველაზე ძვირად ღირებული ბინაა.

ბინის ფართი 223 კვადრატული მეტრია. ყველგან ფუფუნება და სიმდიდრეა, სახლი მუზეუმს უფრო ჰგავს. ჭერი სამ მეტრზე მაღალია, მაგრამ იმდენად დატვირთულია, თითქოს უნდა გაგსრისოს. ანტიკური სვეტები, ოქროს მარმარილოს იატაკი, ბარელიეფები, ფრესკები კედლებზე, მოოქროვილი დეკორი. ავეჯი იმპერიული ეპოქის შთაგონებით არის დამზადებული. მსგავსს მართლაც მუზეუმშიღა თუ შეხვდებით.

დერეფანში ჭერიდან მოოქროვილი არწივები იმზირებიან, კედლებიდან კი მკერდმოშიშვლებული ნიმფები.

ჯერჯერობით ბინის შესახებ უფრო მეტს საუბრობენ გაოცებულები, ვიდრე მისი შეძენის სურვილს გამოთქვამენ.